Sheol Méara na Gaillimhe, an Comhairleoir Clodagh Higgins, dhá thionscnamh nua leis an aidhm méadú a chur ar an méid Gaeilge labhartha i gcathair na Gaillimhe.
Ag preasócáid a bhí ar súil in Ollscoil na Gaillimhe le déanaí, cuireadh fáilte roimh na suaitheantais, atá deartha ag Ollscoil na Gaillimhe, rud a dhéanfaidh easca do Ghaeilgeoirí a chéile a aithint. An dara togra ná, An tEolaire – Seirbhís i nGaeilge, liosta de na gnólachtaí agus de na heagraíochtaí sa gcathair atá in ann seirbhís i nGaeilge a chur ar fáil.
Seoladh na tograí seo mar chuid de Phlean Teanga do Chathair na Gaillimhe. Dúradh go mbeidh ról lárnach ag na tograí chun stádas mar, “Baile Seirbhíse Gaeltachta” a bhaint amach do Ghaillimh.
Dúirt Uachtarán Ionaid agus Meabhránaí na hOllscoile, an tOllamh Pól Ó Dochartaigh, go gcuideoidh an tionscnamh seo le haghaidh,
“…freastal níos fearr agus níos leithne a dhéanamh ar phobal Gaeilge na hOllscoile’ mar go léireodh na suaitheantais ‘a mhéad daoine atá ag obair ar fud na hOllscoile a bhfuil ar a gcumas agus atá sásta seirbhísí a chur ar fáil i nGaeilge.”
Ag caint ar an dara togra, dúirt Cathaoirleach Gaillimh le Gaeilge, Bernadette Mullarkey, go raibh 64 gnó agus eagraíocht liostáilte san Eolaire agus go raibh 96 duine cláraithe ann faoi láthair ó réimsí earnálacha sa gcathair.
D’iarr sí ar ghnólachtaí agus eagraíochtaí le Gaeilge clárú le bheith san Eolaire,
“Mholfainn d’aon duine atá in ann seirbhís i nGaeilge a chur ar fáil, é sin a chur in iúl do ‘chuile dhuine’ trí chlárú le Gaillimh le Gaeilge inniu.”
Beidh eolas maidir le himeachtaí Gaeilge a bheidh ag tarlú sa gcathair le fáil san Eolaire freisin.
Tá súil ag Gaillimh le Gaeilge a bheith ag comhoibriú le Ollscoil na Gaillimhe ar chomhfhiontair straitéiseacha fhéideartha eile sa todhchaí.
