Tá spreagadh á thabhairt ag Comhaltas na Mac Léinn, Ollscoil na Gaillimhe, do mhic léinn seasamh mar iarrthóirí sa toghchán don Choiste Feidhmiúcháin 2026/27. I measc iar-Uachtaráin ar Chomhaltas na Mac Léinn, Ollscoil na Gaillimhe, tá Micheál D. Ó hUigínn, Pat Rabbitte agus Eamon Gilmore. Beidh 18 bpost mar oifigeach le líonadh i mbliana agus is poist lánaimseartha le pá iad ceithre cinn acu. Beifear in ann ainmniúchán a dhéanamh ón 25 Feabhra.
Is léiriú iad na poist ar na príomhréimsí ina bhfuil sainordú ag an gComhaltas ionadaíocht a dhéanamh ar na 19,000 mac léinn is baill iad, ó Oifigeach na Mac Léinn Idirnáisiúnta go dtí an tOifigeach Comhshaoil agus Inbhuanaitheachta. I gcás na mac léinn a sheasann do na poist mar oifigigh lánaimseartha; Uachtarán, Leas-Uachtarán/Oifigeach Oideachais, Leas-Uachtarán/Oifigeach Leasa agus Comhionannais, agus an Leas-Uachtarán don Ghaeilge, cuireann siad a gcuid staidéar siar go ceann bliana le bheith ag obair go lánaimseartha sna róil thábhachtacha sin.
Arsa Uachtarán Chomhaltas na Mac Léinn, Ollscoil na Gaillimhe, Maisie Hall: “Táimid ag spreagadh gach mac léinn in Ollscoil na Gaillimhe le machnamh a dhéanamh ar sheasamh mar iarrthóir sa toghchán i mbliana. Is am an-spreagúil é do ghluaiseacht na mac léinn agus beidh na mic léinn a sheasann mar iarrthóirí sa toghchán in ann a gcion féin a dhéanamh chun áit níos fearr dúinn go léir a dhéanamh d’Ollscoil na Gaillimhe. Má tá tú féin, nó aon duine ar a bhfuil aithne agat, ag smaoineamh ar pháirt a ghlacadh i bpolaitíocht na mac léinn, seo é do sheans a bheith rannpháirteach agus seasamh ar son chearta na mac léinn.”
Arsa Leas-Uachtarán de chuid Chomhaltas na Mac Léinn/an tOifigeach Oideachais, Seán De Búrca: “Tá ról lárnach ag Comhaltas na Mac Léinn chun cearta an 19,000 mac léinn is baill iad a chosaint, a chur chun cinn agus a chur i bhfeidhm. Is deis iontach é a bheith i d’iarrthóir i dtoghchán Chomhaltas na Mac Léinn chun tionchar díreach a imirt ar shaol na mac léinn agus do scileanna ceannaireachta, eagrúcháin, cumarsáide, idirbheartaíochta agus abhcóideachta a fhorbairt ag an am céanna. Beidh tú i do cheannaire in eagraíocht ar leith, agus d’fhéadfadh deiseanna iontacha eascairt as sin, mar atá léirithe ag an Iar-Uachtarán, Mícheál D. Ó hUigínn!”
